Imam Kay Peeche Surah Fatiha Padhne ki Hadeesein Aur Unka Jayza (02)

 

Imam Kay Peeche Surah Fatiha Padhne ki Hadeesein Aur Unka Jayza (02)

【Daleel Number 6 Ka Jaiza】 

Hazrat Anas Bin Malik Radialla Taala Anhu Se Marwi Hai Ke Ek Martaba Nabi Muhammad ﷺ Ne Sahaba Ko Namaz Padhai. Jab Farigh Huye To Muktadi Ki Taraf Dekh Kar Farmaya, "Kya Tum Imam Ke Peechay Qiraat Karte Ho?" Sahaba Khamosh Rahe. Aap ﷺ Ne Is Baat Ko Teen Martaba Dohraya. To Ek Shakhs Ne Kaha, "Ji Haan, Hum Qiraat Karte Hain." Aap ﷺ Ne Farmaya, "Aisa Na Karo, Lekin Surah Al-Fatihah Ko Aahista Padh Liya Karo."

 

1. Juz' Qira'at, Safa 54.

2. Kitab Al-Qira'at, Safa 47.

3. Sunan Al-Kubra Jild 2 Hadith No. 2923.

 

Ghair Muqallid Hazraat Imam Haithami Ka Qoul Pesh Karte Hain Ke Unhone Farmaya Ke Iske Tamam Rawi Siqah Hain.

 

Iska Jawab Yeh Hai Ke Agar Bina Daleel Koi Riwayat Sahih Keh Di Jaye To Phir Koi Aisi Hadees Na Rahe Jispar Zaeef Ka Hukm Lagaya Ja Sake. Warna Iski Sehat Per Koi Daleel Mojood Nahi Aur Yeh Hadees Bhi Zaeef Hai.

 

Awwalan Isliye Ke Isme Abu Qulabah Hai Jo Ki Mudallis Hai Aur An Ana Se Riwayat Karta Hai Aur Khud Ghair Muqallid Ke Nazdeek Mudallis Ka 'An'ana Qabool Nahi Hota Aur Naahi Mudallis Ki Riwayat Qabool Hai Siwaye Shaikhain Ke Toh Ab Kyo Yeh Hazraat Is Hadees Ko Pesh Karke Apne Usoolo Se Khilwad Karte Hai Kya Sirf Isliye Ki Wo Apne Mazhab Ke Muwafik Hai

Note: Hamre Nazdeek Imam Abi Qulabah Siqah Sabt Hai Aur Inka An Ana Bhi Qabul Hai.

Doosri Baat Yeh Ke Is Hadees Ki Sanad Zabardast Izterab Hai:

1.       Ek Turuq Mein Abu Qulabah Hazrat Anas Se Riwayat Karte Hain

Juz' Qira'at, Safa 54

Kitab Al-Qira'at Safa 47

2.       Baaz Turuq Mein Abu Qulabah Seedha Nabi ﷺ Se Riwayat Karte Hain

Sunan Al-Kubra Jild 2 Hadith No. 2925

3.       Ek Sanad Mein Abu Qulabah Muhammad Bin Abi Aisha Se, Unhone Ek Naamaloom Sahabi Se Aur Unhone Nabi ﷺ Se Riwayat Ki

Talkhis Al-Habir, Safa 86

4.       Aur Ek Sanad Mein Abu Qulabah Hazrat Abu Huraira Se Riwayat Karte Hain

Sunan Al-Daraqutni, Safa 1, Hadith No. 129

 

Aap Khud Hi Faisla Karein Ke Ek Ravi Kabhi Nabi ﷺ Se Riwayat Karta Hai, Kabhi Sahabi Se, To Kabhi Kisi Tabi'i Se, Jab Ke Inhone Nabi ﷺ Ka Zamana Paaya Hi Nahi. Aur Gaur Talab Baat Yeh Hai Ke Shaded Izterab Wali Riwayat Ghair Muqallid Hazraat Ke Nazdeek Bilkul Hujjat Nahi Phir Kyo Yeh Janab Is Hadees Per Seena Thok Kar Ahnaaf Ko Khual Challenge Karte Phirte Hai.

【Daleel Number 7 Ka Jaiza】 

Abu Qatada Se Marwi Hai Ke Nabi Muhammad ﷺ Ne Irshad Farmaya, "Tum Mere Peechay Qiraat Karte Ho?" Sahaba Ne Kaha, "Ji Haan," To Aap ﷺ Ne Farmaya, "Surah Al-Fatihah Ke Alawa Kuch Na Padha Karo."

 

1. Sunan Al-Kubra Jild 2 Hadith No. 2926.

 

Iska Pehla Jawab Yeh Hai Ke Is Sanad Mein Ek Munkar Rawi Malik Bin Yahya Hai Jiske Bare Mein Aimma-E-Jarh Wa Ta'dil Ne Kalam Kiya Hai.

1. Imam Ibn Hibban Is Par Kalam Karte Hain.

2. Imam Bukhari Farmate Hain Ke Iski Hadees Nazar Aur Kalam Hai.

3. Imam Uqayli Aur Ibn Hibban Isko Zuafa Mein Likhte Hain Aur Isko Munkar Hadees Kehte Hain Aur Farmate Hain Ke Isse Ihtijaj Jaiz Nahi Kyunke Yeh Shakhs Aise Riwayatain Bayan Karta Hai Jinki Koi Asliyat Nahi Hoti

4. Imam Ibn Adi Farmate Hain Ke Iski Hadees Mehfooz Nahi Hai.

Lisaan Al-Mizan, Jild 5, Safa 7.

5. Allama Ibn Khaldun Apni Kitab Mein Farmate Hain Ke Imam Bukhari Ka Yeh Aitiraz Hai Ke Jab Woh Kisi Ravi Ke Bare Mein Kehte Hain Ke Iski Hadees Me Nazar Hai To Uski Riwayat Intehai Zaeef Hoti Hai.

Al-Muqaddimah, Safa 318.

 

Doosri Baat Yeh Ke Is Hadees Mein Sulayman Tayami Lafz “Hudistu” Ke Lafz Se Riwayat Bayan Kartei Hai ,Ab Na Maaloom Ke Woh Rawi Kaun Tha, Kaisa Tha, Adil Tha Ya Faasiq, Sahi Tha Ya Zaeef?

 

Kyoki Imam Haakim Apni Musnad Ul Ki Tareef Bayan Karte Hue Likhte Hai Is Mein Ukhbar Tu Aur Hadistu An Fala Na Ho

Ma'arif Ul-Uloom Al-Hadees, Safa 19.

 

Teesri Baat Yeh Ke Imam Baihaqi Ne Is Hadees Ko Mursal Kaha Hai Aur Ghair Muqallid Ke Nazdeek Mursal Qabool Nahi Hoti. Aur Inhi Ke Ek Aalim Zuber Ali Zai Ne Zaeef Hadees Ki Tareef Kuch Yun Farmayi Hai:

   - "Har Woh Hadees Jisme Sahih Aur Hasan Hadees Ki Sifat Mojood Na Ho To Woh Zaeef Hadees Hogi. Aur Iski Iqsaam Yeh Hain: Mauzu, Munkar, Maklub, Shadh, Muallal, Muztarib, Mursal, Etc."

Nur Ul Aynen Safa 60.

Lihazah Yeh Hadees Khud Inhi Ke Usoolo Se Zaeef Hai.

【Daleel Number 8 Ka Jaiza】 

Hazrat Abdullah Bin Huzaifa Radialla Taala Anhu Se Marwi Hai Ke Unhone Ek Martaba Namaz Padhi Aur Buland Awaaz Se Qiraat Ki. Toh Nabi Muhammad ﷺ Ne Farmaya, "Aye Ibn Huzaifa Mujhe Na Sunao Balki Khuda Ko Sunao"

1. Kitab Ul-Qiraat, Safa 55.

Is Hadees Se Bhi Janab-E-Wala Ka Istidlal Baatil Hai Kyunke Iski Sanad Mein Ek Ravi Nu'man Bin Rashid Hai Jinpar Kalam Hai.

 

1. Imam Bukhari Farmate Hain Ke Inki Hadees Mein Bakasarat Wahm Hota Hai.

2. Imam Ahmad Isko Munkar Hadees Bayan Karne Wala Kehte Hain.

3. Aur Farmate Hain Iski Hadees Mein Iztiraab Hai.

4. Imam Abu Dawood.

5. Imam Nasa'i.

6. Imam Ibn Mu'een.

7. Aur Yahya Bin Saeed Yeh Sab Inko Zaeef Kehte Hain.

Lisaan Ul-Mizan, Jild 3, Safa 237.

 

Doosri Baat, Is Hadees Se Zara Bhi Pata Nahi Chalta Ki Ibn Huzaifa Imam Ke Peechay Hain Ya Munfarid Hai, Lihaza Is Hadees Ko Daleel Banana Galat Hai.

 

【Daleel Number 9 Ka Jaiza】

Hazrat Ali Radialla Taala Anhu Se Marwi Hai Ke Wo Is Baat Ko Pasand Karte Aur Iska Hokum Dete Hai Thay Ki Imam Ke Peeche Zohar Aur Asar Ki Pehli 2 Rakato Mein Surah Fatiha Aur Iske Sath Dusri Surah Bhi Padhi Jaye Aur Pichli Do Rakaton Mein Sirf Surah Fatiha Padhi Jaye.

 

1. Sunan Kubra Lil Bayhaqi, Jild 2, Hadith 2932.

2. Mustadrak, Jild 1, Safa 239.

Jawab

Iska Jawab Ye Hai Ke Is Rivayat Se Bhi Ghair Muqallid Hazraat Ko Koi Faida Nahi Kyunki Is Hadees Ke Ek Ravi Sufyan Bin Hussain Hai Aur In Par Aimma-E-Jarh Wa Ta’deel Ne Kalam Kiya Hai.

 

1. Imam Ahmad Kehte Hain Ke Zahri Ki Rivayat Mein Wo Nihayat Zaeef Aur Kamzor Hain.

2. Yahya Bin Kittaan Aur Ibn Mu’in Farmate Hain Ke Zahri Ki Rivayat Mein Ye Siqah Na Thay

3. Ibn Sa’d Kehte Hain Ke Hadees Ki Rivayat Mein Inse Bohot Sari Khata Hoti Hai.

4. Aur Yehi Baat Yaqub Bin Shaiba Ne Kahi.

5. Abu Hatim Kehte Hain Inse Ehtijaz Jaiz Nahi.

6. Imam Ibn Hibban Kehte Hain Ke Ye Imam Zahri Se Ulat-Pulat Hadeesein Bayan Karta Hai.

7. Imam Nasa’i Kehte Hain Ke Ye Imam Zahri Ki Rivayat Mein Zaeef Hai.

8. Imam Ibn Adi Kehte Hain Ke Ye Zahri Ki Rivayat Mein Qabil E Ihtijaj Nahi

Mizan, Jild 1, Safa 394

9. Hafiz Ibn Hajar Likhte Hain Ke Zahri Ki Rivayat Zaeef Hai

Taqreeb, Safa 151

 

Jab Sufyan Bin Hussain Ko Itne Aimma-E-Muhaddiseen Ne Zaeef Kaha Hai To H Phir Issey Istidlal Baatil Hai.

 

【Daleel Number 10 Ka Jaiza】 

Hazrat Abi Bin Ka'b Radialla Taala Anhu Se Marwi Hai Ke Aap Imam Ke Peeche Qiraat Karte The.

1. Kitab Ul-Qiraat, Safa 62.

 

Jawab

Iska Jawab Ye Hai Ke Iski Sanad Mein Ek Zaeef Ravi Ziyad Bakai Hai, Iske Bare Mein Muhaddiseen Ke Aqwaal Dekhein:

 

1. Imam Nasa’i Kehte Hain Ke Wo Qawi Nahi Tha (Al Zuafa Safa 43)

2. Abu Hatim Kehte Hain Ke Inse Ehtijaz Sahih Nahi Hai.

3. Ibn Madini Aur Ibn Sa’d Isko Zaeef Kehte Hain (Mizan, Jild 1, Safa 357).

4. Ibn Mu’in Kehte Hain Ke Hadees Mein Ye Qabil-E-Aitbaar Nahi.

5. Salih Ka Bayan Hai Ke Wo Zaeef Hai.

6. Ibn Hibban Isko Faahish Aur Kasir-Ul-Wahm Kehte Hain (Tahdhib Ul-Tahdhib, Jild 3, Safa 375).

7. Hafiz Ibn Hajar Likhte Hain Ke Ye Kamzor Hai (Taqreeb, Safa 132).

 

Lihaza Is Sanad Se Ye Hadees Zaeef Hai

Aur Yehi Hadees Doosri Sanad Se Sunan Al Kubra Lil Bahaqi Jild 2 Hadees 2936 Manqul Hai Jiski Sanad Mein “Abu Zafar Razi” Jiska Naam Isa Bin Abi Isa Hai Aur Yeh Zaef Hai.

1. Imam Ahmad Aur Imam Nasa’i Kehte Hain Ke Wo Qawi Na Tha.

2. Ibn Madini Isko Sahibe-Khata Kehte Hain.

3. Falash Isko Kamzor Hafize Wala Kehte Hain.

4. Ibn Hibban Kehte Hain Ke Mashhur Rawi Se Munkar Riwayate Bayan Karta Hai.

5. Abu Zarah Kehte Hain Ke Wo Baksarat Wahm Ka Shikar Tha (Mizan, Jild 2, Safa 315).

6. Saaji Kehte Hain Ke Wo Sahibe-Itqan Na Tha.

7. Ibn Khirash Isko Kamzor Hafize Wala Kehte Hain.

8. Imam Azli Kehte Hain Ke Wo Qawi Na Tha.

9. Hafiz Ibn Hajar Isko Kamzor Hafize Wala Kehte Hain (Tahdhib Ul-Tahdhib, Jild 12, Safa 57).

 

Lihaza Is Hadees Ke Dono Tareeq Nihayat Zaeef Hain Jis Se Fareeq-E-Sani Ka Istidlal Baatil Thehrata Hai.

END Part 02

Part 03 Link

https://786sho.blogspot.com/2024/05/imam-kay-peeche-surah-fatiha-padhne-ki_57.html