Imam Kay Peeche Surah Fatiha Padhne ki Hadeesein Aur Unka Jayza (01)

 

Imam Kay Peeche Surah Fatiha Padhne ki Hadeesein Aur Unka Jayza (01)

Ye Mauzoon Namaaz Ke Kuch Un Masaailon Mein Se Hai Jin Ke Bare Mein Aimah E Ummat Mein Ikhtilaf Wa Hay Aur Yahaan Aimah E Ummat Ke Mukhtalif Masalik Ko Bayaan Karna Munaasib Hoga Jisse Baat Saaf Zaahir Ho Jaye Ke Kin Aimah Ke Nazdeek Kya Raaye Hai.

 

1. Ba'az Aimah Ke Nazdeek Imam Ke Peeche Surah Fatiha Padhna Waajib (Balki Farz) Hai, Chahe Namaaz Sirri (Khafi) Ho Ya Jahri Aur Yahi Imam Shafi'i Ka Maslak Hai. (Sharah Ul Madhab, Jild 1, Safa 323)

 

2. Imam Ahmad Bin Hanbal Ka Madhab Inke Qawl Mein Jahri Namaazon Mein Adame Waajib Ba Qadm Istihbab Bayan Kiya Hai Aur Farmate Hain Aur Yahi Humare Imam (Ahmad Bin Hanbal), Imam Zuhri, Imam Malik, Imam Ibn Uyainah, Imam Ibn Mubarak, Aur Imam Ishaq Ka Maslak Hai Aur Imam Shafi'i Ka Ek Qawl Bhi Hai. (Al-Mughni, Jild 1, Safa 392)

 

3. Imam Malik Ke Nazdeek Sahi Qawl Wahi Hai Jo Imam Ahmad Bin Hanbal Ke Nazdeek Hai Ke Jahri Namaazon Mein Padhna Aur Sirr Namaazon Mein Padhna Waajib Hai. (Sharh Ul Madhab, Jild 1, Safa 323; Al-Mughni, Jild 1, Safa 365)

 

4. Mazhab E Imam Abu Hanifa Ke Bare Mein Imam Muhammad Farmate Hain Ke Imam Ke Peeche Qira'at Karna Jaaiz Nahi Agar Chahe Namaaz Sirr Ho Ya Jahri Aur Yahi Imam Abu Hanifa Ka Qawl Hai.

 

1. Moata Imam Muhammad Kitab Ul Salat Safa 93

2. Kitab Ul Aasaar Kitab Ul Salat Safa 62

3. Al Hidaya Jild 1, Safa 102

 

Is Mukhtasar Tafseel Se Pata Chala Ke Imam Abu Hanifa Ke Saath Aimah E Arba'a Mein Se Imam Malik Aur Imam Ahmad Bin Hanbal Hain Jo Muqtadi Ka Jahri Namaaz Mein Qira'at Karna Jaaiz Nahi Samajhte. Aur To Aur, Imam Ahmad Bin Hanbal To Yahan Tak Farmate Hain Ke "Ye Rasool Allah ﷺ" Aur Aapke Sahaba Radi Allahu Anhum Aur Ye Imam Malik Ahle Hijaz Mein Se Hain, Imam Sauri Ahle Iraq Mein Se Hain, Aur Imam Awzai Ahle Shaam Mein Se Hain, Aur Imam Abu Laish Ahle Misr Mein Se Hain. In Hazraat Mein Se Kisi Ne Bhi Ye Nahi Kaha Ke Aadmi Namaaz Padhe Aur Iska Imam Qira'at Kare Aur Wo Khud Qira'at Na Kare To Uski Namaaz Baatil Hai. (Al-Mughni, Jild 1, Safa 393)

 

Yahan Is Mauzoo Ko Zikr Karne Ka Maqsad Kisi Par Keechad Uchhalna Nahi Balki Logon Tak Is Maslay Ki Kitab O Sunnat Se Haqeeqat Pohchani Hai Taakay Awaam Ko Un Logon Ke Bare Mein Pata Chale Jo Ye Kehte Hain Ke Jisne Imam Ke Peeche Bhi Surah Fatiha Na Padhi Uski Namaaz Baatil Wa Naqis Hai Jabke Hum Imam Ahmad Ka Qawl Pehle Hi Pesh Kar Chuke Hain Ke Inhone Kisi Bhi Imam Aur Mujtahid Ko Aisa Kehte Hue Nahi Suna Phir Ye Ghair Muqallid Kaun Hote Hain Aisa Kehne Wale Ye Inka Khud Saakta Nazariya Hai Jo Inhone Imam E Azam Se Ta'assub Ki Bunyad Par Ghad Liya Hai Jise In Sha ALLAH Aage Kitab O Sunnat Se Sabit Kiya Jayega. In Sha ALLAH Ab Hum Ghair Muqallid Hazraat Ke Un Dalaail Ka Jaeza Lenge Jin Se Unhone Istidlal Kiya Hai.

 

Ghair Muqallid Hazraat Sabse Pehle Quran Ki Is Ayat Say Daleel Lete Hai.

 

【Daleel Number-1 Ka Jaiza】

【1】 Aur Apne Rab Ko Apne Dil Mein Yaad Karo Zaari Aur Darr Se Aur Be Aawaz Nikle Zubaan Se Subah Aur Shaam Aur Ghaafilon Mein Na Hona. Surah A'raf Ayat 205

 

Is Aayat Ko Pesh Karne Ke Baad Imam Bayhaqi, Ibn Taymiyyah Aur Ghair Muqallid Ke Ek Aalim Farmate Hain Ke Ye Aayat Imam Aur Muqtadi Dono Ke Liye Jahri Aur Sirri Namaaz Mein Shaamil Hai Aur Surah Fatiha Aur Ghair Fatiha Ko Aam Hai Aur Isse Sabit Aata Hai Ke Muqtadi Imam Ke Peeche Surah Fatiha Aahista Aahista Padhna Sahi Hai. Imam Bayhaqi Apni Sanad Se Is Ka Matlab Bayan Karte Hue Hazrat Zaid Bin Aslam Ka Qawl Bhi Bayan Karte Hain.

1. Bayhaqi Fis Masa'il Kitab Ul Qira'at Safa 72

2. Ibn Taymiyyah Fataawa Jild 2, Safa 149

3. Khairul Kalam Safa 68

 

Jawab:

Is Aayat Se Imam Ke Peeche Surah Fatiha Padhne Ka Istidlal Ghalat Hai. Pehli Baat Ye Ke Agar Waqai Is Aayat Se Imam Ke Peeche Surah Fatiha Padhna Muraad Hota To Ye Baat Nabi ﷺ Aur Aapke Sahaba Radi Allahu Anhum Aur Tabe'in Hazraat Se Har Giz Chupi Na Rehti. Kamal Hai Jo Baat Nabi ﷺ Ne Nahi Farmaayi Aur Aapke Sahaba (Radi Allahu Anhum) Ko Samajh Nahi Aayi, Wo Unke Baad Ke Insano Ko Aayi Hai?

 

Doosri Baat Ye Ke Ye Daleel Surah A'raf Ki Sahih Tafseer Ke Khilaaf Hai Jo Hum Ahnaf Ke Dalaail Ke Tehat Zikr Karenge.

 

Aur Teesri Baat Ye Ke Is Aayat Mein Na To Imam Ka Zikr Hai Na Muqtadi Ka Aur Na Hi Qira'at Surah Fatiha Ka, Phir Ye Kisi Ki Manmani Taweel Ka Taqleed Ki Jaye Aur Agar In Hazraat Ki Baat Maan Li Jaye To Kya Ghair Muqallid Hazraat Imam Ke Peeche Surah Fatiha Ke Alawa Bhi Doosri Surah Padhne Ke Qail Hain? Phir Ye Aayat Ko Sirf Surah Fatiha Par Mukhtasir Kyun Kiya Jaye!

 

Chauthi Baat Ye Ke Avvalan To Ye Aayat Namaaz Ke Bare Mein Hai Hi Nahi Aur Ba Fazal Agar Ye Aayat Namaaz Ke Bare Mein Maan Li Jaye To Isse Sirf Imam Aur Munfarrid Muraad Hoga Na Ke Muqtadi. Kyun Ke Is Aayat Ke Mufrad Se Ye Baat Dalalat Karti Hai Aur Isse Pehle Wali Aayat

"Aur Jab Quran Padha Jaye To Usse Kaan Laga Kar Suno Aur Khamosh Raho Ke Tum Par Raham Ho" (-204) Surah A'raf Mein Muqtadi Muraad Hai Kyukay Ismay Tamam Segay Jama Ke Istemal Huwe Hai

 

Ab Rahi Imam Bayhaqi Ki Wo Riwayat Jo Hazrat Zaid Bin Aslam (Radi Allahu Anhum) Se Manqool Hai, Uska Jawab Ye Hai Ke Iski Sanad Mein Ek Ravi Abdul Aziz Bin Muhammad Hai Jiske Bare Mein Aimah-E-Muhadditheen Ne Kalaam Kiya Hai.

1. Imam Abu Zur'a Ne Inko Kamzor Hafize Wala Kaha.

2. Imam Ahmad Aur Imam Ibn Hibban Ne Inko Yukhti Se Taabeer Kiya.

3. Imam Sa'zi Ne Inko Kasir Ul Wahm Wala Kaha Hai.

(Tahdhib Al-Tahdhib Jild 6, Safa 354)

 

Aur Isi Ka Ulta Hazrat Zaid Bin Aslam (Radi Allahu Anhum) Se Hi Tark-E-Qirat Khalaf Ul Imam Ki Riwayat Sahih Sanad Se Manqool Hai, Phir Is Zaeef Riwayat Ka Us Sahih Riwayat Se Kya Muqabla?

 

Lihazaa Ye Istidlal Ghalat Aur Be-Bunyaad Hai.

 

【Daleel Number 2 Ka Jaiza】

【2】Hazrat Ubadah Bin Samit (Radi Allahu Anhum) Se Rivayat Hai Ke Rasool Allah ﷺ Ne Farmaya, "Jis Ne Namaz Mein Surah Fatiha Nahi Padhi Uski Namaz Hi Nahi."

 

1. Sahih Bukhari, Kitab-Ul-Azan, Hadees No. 756

2. Sahih Muslim, Kitab-Us-Salat, Hadees No. 869

 

Is Hadees Ko Dekh Kar Gair Muqallid Hazraat Kehte Hain Ke Kyukay Lafz Mann Ke Maani Hokum Aam Ke Hain Aur Is Mein Imam Wa Munfarid Ka Koi Qayd Nahi Hai, Lihaza Har Us Shakhs Ki Namaaz Nahi Hogi Jo Namaaz Mein Surah Fatiha Na Padhe Chahe Wo Imam Ho, Muqtadi Ho, Ya Munfarid Ho.**

 

Jawab

Beshak Yeh Hadees Sanad Aur Matn Ke Lehaaz Se Aala Qism Ki Hai Lekin Is Hadees Mein Nabi ﷺ Ne Muqtadi Ki Qira'at Bhi Muraad Nahi Li, To Phir Ghair Muqallid Ka Istidlal Bhi Baatil Hai Ke Is Hadees Mein Ba-Jama'at Namaaz Ka Zikr Hi Nahi Hai Aur Jab Tak Mukhalif Hazraat Yeh Sabit Na Kar Dein Ke Rasoolullah ﷺ Ne Namaaz Ba-Jama'at Ke Baare Mein Yeh Farmaya Hai Tab Tak Inka Daawa Bhi Ghalat Hai.

Aur Dusra Jawab Yeh Ke Is Hadees May Lafz “Mann” Istimaal Hua Hai Aur Ghair Muqallid Hazraat Agar Yeh Sabit Kar Dein Ki Lafz 'Mann' Aam Hi Istimaal Hota Hai Kabhi Kisi Khaas Moqa Ya Shakhs Par Istimaal Nahi Hota Tab To Inka Daawa Sahi Hai Lekin Yaqeen Maniye Lafz “Mann” Kabhi Aam Istemal Hota Hai Aur Kabhi Khaas, Hawala Mulahiza Farmaye.

 

(1) ءَاَمِنْتُمْ مَّنْ فِی السَّمَآءِ اَنْ یَّخْسِفَ بِكُمُ الْاَرْضَ فَاِذَا هِیَ تَمُوْرُ

 

“Kya Tum Se Na Darte Ho Jiski Sultanat Aasman May Hai” Surah Mulk Ayat 16

 

Yaha Lafz “Mann” Aya Hai Aur Yeh Khaas Ma’ani Mein Istimaal Hua Hai Ke Yahaan Muraad Sirf Allah Ki Zaat Hai Na Ke Sab Aasman Waale Muraad Hain.

 

(2) “Nabi ﷺ Ne Farmaya, Tumse Pehle Log Is Liye Halaak Hue Ke Kamzor Par To Hadd Qaim Karte Aur Buland Martaba Waalon Ko Chhod Dete”

(Sahih Bukhari, Kitab Ul Diyat, Hadees 6787)

 

Yaha Lafz Bhi “Mann” Khaas Ma’ani Mein Istimaal Hua Hai Jisme Un Logon Ke Baare Mein Bataya Gaya Hai Jo Allah Ke Ahkaam Ko Ameer Logon Ke Liye Badal Dete The Na Ke Aam Logon Ke Liye.

 

Lihaza Lafz “Mann” Se Istidlal Karna Mehaz Kham Khayaali Hai Aur Yahaan Aam Logon Ki Jagah Khaas Imam Ya Munfarid Hi Jaiz Hai.

 

Akhri Jawab: Hum Kehte Hain Ke Is Hadees Mein Sirf Imam Aur Munfarid Ko Surah Fatiha Padne Ka Hukum Hai Muqtadi Ko Nahi, Kyunke Sahih Muslim Mein Yeh Poori Hadees Is Tarah Hai:

 

(1)    Hazrat Ubadah Bin Samit Radi Allahu Anhu Se Riwayat Hai Ke Rasoolullah ﷺ Ne Farmaya, "Jis Ne Namaaz Mein Surah Fatiha Aur Isse Zyada Kuch Aur Na Padha To Uski Namaaz Hi Nahi"

 

Sahih Muslim, Kitab Ul Salat, Hadees 872

Musnad Abu Awana Jild 1 Safa 450 Hadees 1665

Sunan Nisai Kitab Ul Iftetah Jild 1 Hadees 914

 

Is Turuk Mein Surah Fatiha Ke Alawa Kuch Aur Padhne Ka Bhi Hokum Hai Aur Zahir See Baat Hai Kuch Aur Say Murad Quran Shareef Ki Dusri Surah Hai Aur Kisi Bhi Gair Muqallid Kay Yaha Muqtadi Ka Imam Ke Piche Surah Fatiha Ke Alawa Kuch Aur Tilawat Karna Jayaz Nahi Phir Kyu Yeh Hadees Har Namazi Ke Liye Maan Li Jaye Jabki Khud Inka Is Hadees Per Mukammal Amal Nahi Hai Lihaza Is Hadees Say Muqtadi Ka Imam Ke Peeche Qirat Karne Ka Masala Zarra Barabar Bhi Sabit Nahi Hota.

 

【Daleel Number-3 Ka Jaiza】

【3】Hazrat Abu Hurairah Radi Allahu Anhu Se Riwayat Hai Ke Rasoolullah ﷺ Ne Farmaya "Jis Ne Namaaz Padhi Aur Usmein Surah Fatiha Na Padhi To Uski Namaaz Adhoori Hai." Aur Is Baat Ko Teen Martaba Farmaya. Abu Hurairah Radi Allahu Anhu Se Poocha Gaya Ke Hum Imam Ke Peeche Hote Hain To? Aap Radi Allahu Anhu Ne Farmaya, "Haan Padho Dheere Se."

 

Sahih Muslim, Kitab Ul Salat, Hadees 873

Ibn Majah Aur Abu Dawood Me Yeh Lafz Hai “Toh Unhone Mera Haath Dabaya Aur Kaha “Oo Farsi Isey Mann May Padhle””

Sunan Ibn Majah, Kitab Iqamat As-Salat Wa As-Sunnah, Hadees 838

Sunan Abu Dawood, Kitab Us Salat, Hadees 813

 

Jawab :

Is Hadees Se Nabi ﷺ Se Sirf Yeh Baat Sabit Ho Rahi Hai Ke Jis Ne Surah Fatiha Nahi Padhi Uski Namaaz Nahi, Lekin Yeh Sabit Nahi Ho Raha Ke Aap ﷺ Ne Imam Aur Munfarid Ke Muta'alliq Kaha Ya Muqtadi Ke Baare Mein Kyuki Sunan Abu Dawood Mein Hi:

 

(1   Hazrat Abu Hurairah Radi Allahu Anhu Se Hi Marwi Hai Ke Nabi ﷺ Ne Mujhe Farmaya Ke 'Madinah Mein Ailan Karo Ke Namaaz Nahi Hoti Quran Ke Baghair Chahe Surah Fatiha Ho Ya Uske Alawa Aur Kuch.'

(Sunan Abu Dawood, Kitab Us Salat, Hadees 811-12)

 

Yah Toh Fatiha Ke Alawa Aur Kuch Zyadz Padhe Baghair Namaaz Nahi Hoti Aur Aisa Tab Bhi Mumkin Hai Jab Namaazi Ya To Imam Ho Ya Phir Akela. Kyunke Muqtadi Ke Liye Surah Fatiha Se Zyada Kuch Aur Padna To Ghair Muqallid Ke Yahaan Bhi Jaiz Nahi. Lihaza Yeh Bhi Muqtadi Ke Liye Nahi Hai.

 

Doosri Baat Yeh Ke Abu Hurairah Radi Allahu Anhu Ka Yeh Farmaana Ke Muqtadi Ko Apne Mann Mein Pad Le Na Chahiye Yeh Rasoolullah ﷺ Ki Hadees Nahi Balki Hazrat Abu Hurairah Radi Allahu Anhu Ka Ijtihad Hai Aur Aap Ne Nabi ﷺ Ke Qawl “Mann Salli” Aakhir Tak Se Khud Ijtihad Kar Ke Yeh Baat Sahil Ko Bataayi Jab Ke Yeh Nabi ﷺ Ka Hadees Nahi Aur Ghaur Talab Baat Yeh Hai Ke Ghair Muqallid Hazraat Jinke Nazdeek Sahaba Ka Qawl Bhi Hujjat Nahi Hai Phir Ab Yeh Kyo Tasleem Kar Rahe Hain.

Dekhiye Inhi Ke Kitaabein:

1. (Fatawa Naziria Safa 340)

2. (Arful Jawi Safa 38)

3. (Taju’l Muqallal Safa 292)

 

Lekin Ghaur Talab Baat Yeh Hai Ke Yeh Ghair Muqallid Is Masle Mein Ahnaaf Ke Dalaail Ko Sirf Is Liye Tark Kar Dete Hain Kyukay Unme Aksar Sahaba Ke Qawl Hain Missal Kay Taur Per

(2    Hazrat Ata Bin Yasar Rahmatullah Alaihe Se Riwayat Karte Hain Ke Unhone Zaid Bin Thabit Radi Allahu Anhu Se Imam Ke Saath Qira’at Karne Ke Baare Mein Daryaft Kiya Toh Hazrat Zaid Bin Thabit Radi Allahu Anhu Ne Farmaya Imam Ke Saath Kisi Cheez Mein Qira’at Nahi.

Sahih Muslim, Kitab Ul Masaajid, Hadees 1293

Sunan Nisai Kitab Ul Iftetah Jild 1 Hadees 963

Sunan Al Kubra Lil Nisai Jild 1 Hadees 1032

Musnadul Awana Jild 1 Hadees 1951

Sunan Al Kubra Lil Bayhaqi Jild 2 Hadees 2911

Sharah Mani Ul Aasar Jild 1 Hadees 1224

 

(3    Hazrat Jabir Bin Abdullah Radi Allahu Anhu Ne Farmaya Jisne Koi Rakat Padhi Aur Usme Surah Fatiha Na Padhi To Goya Usne Namaaz Hi Nahi Padhi. Siwa Iske Ke Wo Imam Ke Peeche Ho.

Imam Tirmizi Farmate Hain Yeh Hadees Hasan Sahih Hai.

Sunan Tirmizi, Kitab Us Salat, Hadees 295

Muwatta Imam Malik, Kitab Us Salat, Hadees 178

Musannaf Abdur Razzaq, Hadees 2745

Musannaf Ibn Abi Shaiba, Hadees 3641

Sunan Kubra Lil Bayhaqi, Hadees 2899

Sharh Ma'ani Ul Aasar, Hadees 1209

Sunan Daraqutni, Kitab Us Salat, Hadees 1226

 

Jab In Sahaba Se Yeh Baat Saaf Maaloom Ho Rahi Hai Ke Muqtadi Ke Alawa Kisi Ki Bhi Namaaz Bina Surah Fatiha Ke Nahi To Phir Kyo Is Hadees Ko Sirf Is Liye Tark Kar Dete Hain Ke Yeh Sahaba Ka Qawl Hai Aur Usko Maan Lete Hain Jo Inke Mazhab Ke Mutabiq Hai Jab Ke Wo Bhi Sahaba Ka Hi Qawl Hai Rasoolullah ﷺ Ki Hadees Nahi.

Teesri Baat Yeh Ke Hazrat Abu Hurairah Radi Allahu Anhu Ka Kehna Hai Ke Ise Man Mein Padh Le Se Murad In Alfaaz Par Ghor Aur Tadabbur Karne Ke Hai Kyoki Sawal Karne Wale Is Baat Ko Achi Tarah Se Jaante The Ke Sare Sahaba-E-Kiram Ke Peechay Kuch Bhi Padhna Khilaf Hai, ( Jiske Dalail Aage Zikar Kiye Jayenge) Isi Liye Unhone Abu Hurairah Radi Allahu Anhu Se Yeh Sawal Kiya Aur Jawab Mein Aapne Bhi Aisa Hikmat Bhara Jawab Diya Ke Woh Bina Kisi Aitiraz Ke Mutmaeen Ho Gaye Aur Man Mein Padh Lene Se Murad Ghor-O-Fikr Hai Aur Is Se Imam Ke Peechay Qirat Karna Laazim Nahi Aayega Kyoki Agar Aap Farmate Ikhfa Kar Toh Iska Matlab Yeh Hota Ke Kam Se Kam Itni Aawaz Mein Padhein Ke Khud Ke Kaan Soon Sakein Aur Yahi Hamare Fuqaha Ka Qaul Hai.

Chunanche Ahnaaf Ke Mashhoor Faqih Allama Ibn Abideen Shami Farmate Hain:

"Kam Se Kam Ikhfa Yeh Hai Ke Khud Ko Sunaye Aur Unko Jo Qareeb Ho." 

(Fatawa Shami, Jild 1, Safa 534-535)

 

Is Ghor-O-Fikr Ka Faayda Yeh Hai Ke Insaan Ke Dimagh Mein Namaz Mein Asar Aur Khayalat Aise Aate Hain Jo Agar Zuban Se Ada Kar Liye Jaayein To Namaz Fasid Ho Jaati Hai (Ya Toot Jaati Hai). Maslan, Gaane, Ghazlein, Waghera, Jismein Insaan Aksar Ghor-O-Fikr Karne Lagta Hai Lekin Phir Bhi Uski Namaz Nahi Toot Ti, Kyunki Ab Tak Woh Sirf Is Par Ghor-O-Fikr Kar Raha Hai. Lekin Insaan Agar Isko Zuban Se Ada Kar De Chahe Aahista Hi Kyun Na Kahe To Uski Namaz Fasid Ho Jaayegi. Isliye Hazrat Abu Hurairah Radi Allahu Anhu Ne Unko Surah Al-Fatihah Ko Man Mein Padh Lene Ko Kaha Ya Ghor-O-Fikr Karne Ko Kaha. Aur Is Hukum Par Toh Ahnaaf Ki Masjidein Bhi Khaali Nahi Hai Lihaza Is Hadith Se Mukhalif Ka Istedalal Karna Naqlan Aur Aqlan Bhi Durust Nahi.

 

【Daleel Number 4 Ka Jaiza】

Haddasna Hannad Haddasna Abd Bin Sulayman An Muhammad Bin Ishaq An Makhol An Mehmood Bin Rabi An Hazrat Ubadah Bin Samit Radialla Taala Anhu Se Riwayat Karte Hain Ke Hum Subah Fajr Ki Namaz Mein Nabi Muhammad ﷺ Ke Peechay Thay To Aap ﷺ Ne Quran Padhna Shuru Kiya. Jab Namaz Se Farigh Huye Toh Farmaya, "Shayad Tum Apne Imam Ke Peechay Padhte Ho?" Hum Ne Kaha, "Ji Haan." To Allah Ke Rasool ﷺ Ne Farmaya, "Siwaye Surah Al-Fatihah Ke Aur Kuch Na Parho, Kyunki Us Shakhs Ki Namaz Nahi Hoti Jo Surah Al-Fatihah Na Parhe."

 

Hazrat Abu Isa Tirmizi Farmate Hain Ke Yeh Hadees Hasan Hai.

1. Sunan Al-Tirmizi, Kitab Al-Salat Jild 1 Hadith No. 293

 

Lekin Hum Kehte Hain Ke Imam Tirmizi Ki Yeh Baat Durust Nahi Hai, Kyunki Is Hadees Ke Ek Ravi Muhammad Bin Ishaq Hasan Ul-Hadees Hone Ke Saath-Saath Mudallis Bhi Hain. Aur Imam Ibn Hajar Waghera Ne Unko Chauthi Tabaqa Ke Mudallisin Ke Tahet Mein Zikr Kiya Hai. Dekhiye Ahl-E-Taqdees Safa No. 46, 125 Aur Is Tabaqa Ke Mudallis Ka 'An'ana Qabool Nahi Hota Aur Aisa Ravi Jab Tak Samahat Ka Izhaar Na Kare, Riwayat Zaeef Maani Jayegi. Lihaza Yeh Riwayat Bhi Zaeef Hai.

 

【Daleel Number 5 Ka Jaiza】

Muhammad Bin Abi Aisha Radialla Taala Anhu Ne Ek Sahabi Radialla Taala Anhu Se Riwayat Kiya Ke Rasool Allah ﷺ Ne Irshad Farmaya, "Shayad Tum Log Padhte Ho Jab Imam Padhta Hai?" Sahaba Ne Arz Kiya, "Ji Haan, Hum Qiraat Karte Hain." Aap ﷺ Ne Farmaya, "Surah Al-Fatihah Ke Siwa Kuch Na Padho."

 

Imam Bayhaqi Farmate Hain Ke Iski Sanad Jayyad Hai.

Musnad Ul Ahmed Jild 5 Safa 234

Sunan Bayhaqi Jild 2 Hadees Hadees 2922

Kitab Ul Qirat Lil Bayhaqi Safa 51

Jawab

Iska Jawab Yeh Hai Ke Na Maloom Imam Bayhaqi Ne Iski Sanad Ko Kaise Jayyad Kaha Hai Jabke Iski Sanad Mein Ek Ravi Ibrahim Bin Abi Lais Hai Jo Ke Zaeef Hai. Jinke Bare Mein Aimma-E-Hadees Ne Kalam Kiya Hai:

1. Salih Kehte Hain Ke Woh 20 Saal Tak Jhoot Bolta Raha.

2. Imam Saji Ne Isko Matrook Kaha Hai.

3. Ibn Mu'een Ne Isko Kazzab Aur Khabees Kaha Hai.

4. Sabse Pehle Iske Jhoot Ki Haqeeqat Durki Nay Wazeh Ki Thi

5. Yaqoob Bin Shaibah Kehte Hain Ke Logon Ne Pehle Isse Riwayatein Likhi Thi Magar Baad Mein Sab Ne Isko Chor Diya Tha Kyunki Iski Jur'at Itni Barh Gayi Thi Ke Woh Jali Aur Mozooh Hadees Bayaan Karne Se Bhi Gurayz Nahi Karta Tha.

6. Imam Nasa'i Kehte Hain Ke Woh Thiqah Nahi Hai.

7. Ibn Saad Kehte Hain Ke Hadees Mein Woh Zaeef Samjha Jata Hai.

(Lisan Ul-Mizan Jild 1 Safa 93-94)

8. Hafiz Khateeb Baghdadi Kehte Hain Ke Ibn Mu'een Ne Pehle Iski Tauseeq Ki Thi Lekin Baad Mein Tahqiq Karne Ke Baad Iski Intehai Muzammat Ki Aur Isko Kazzab Aur Khabees Kaha Aur Farmaya Ke Allah Iska Satyanash Kare Hadees Mein Jhoot Bolta Hai.

9. Imam Ahmad Aur Ali Bin Madini Per Pehle Iska Muamla Chupa Raha Lekin Jab Iska Jhoot Wazeh Hogaya Toh Unhone Isse Riwayatein Lena Tark Kardiya

(Bagdadi Jild 6 Safa 194-196)

 

Lihaza Yeh Hadees Bhi Zaeef Hai Aur Istidlal Ke Qabil Nahi Hai.

Iski Doosri Sanad Bhi Zaeef Hai Aur Woh Bhi Zaeef Se Khaali Nahi Hai.

END Part 01

Part 02 Link

https://786sho.blogspot.com/2024/05/imam-kay-peeche-surah-fatiha-padhne-ki_22.html

Part 03 Link

https://786sho.blogspot.com/2024/05/imam-kay-peeche-surah-fatiha-padhne-ki_57.html